Ta'lim muassalarini attestatsiyadan o‘tkazish mezonlari va texnologiyalari bo‘yicha yo‘riqnomaga o‘zgartirishlar kiritildi
“O‘zbekiston Respublikasi ta'lim muassasalarini attestatsiyadan o‘tkazish mezonlari va texnologiyalari bo‘yicha Yo‘riqnoma”ga kiritilgan o‘zgartirish Kadrlar malakasini oshirish va ularni qayta tayyorlash muassasalariga tegishlidir.
Mazkur Yo‘riqnomaning 13-bandi oltinchi xatboshisida “Tinglovchilarning fan dasturlarini o‘zlashtirish darajasi (bilimi) Komissiya tomonidan o‘tkazilgan nazorat ishlari orqali baholanadi. Nazorat ishlariga tinglovchilarning barchasi jalb qilinadi. Muayyan kurslarda malaka oshirish yoki qayta tayyorlashdagi tinglovchilarning nazorat ishlarida ijobiy baholanganlar salmog‘i kamida 90 foizni tashkil etishi shart” degan jumla qayta tahrir qilinib, “Tinglovchilarning fan dasturlarini o‘zlashtirish darajasi (bilimi) ta'lim muassasasi tomonidan o‘tkazilgan yakuniy nazoratlarni tahlil qilish orqali baholanadi” deb o‘zgartirildi.
Bunday o‘zgartirish kiritilishiga sabab attestatsiya komissiyasi tomonidan attestatsiya davrida attestatsiyaga jalb etilgan barcha malaka oshirish va qayta tayyorlash kurslari bo‘yicha tinglovchilarning bilimini baholash imkoniyati yo‘qligidir. Chunki malaka oshirish va qayta tayyorlash kurslari yil (12 oy) davomida har oyga taqsimlangan holda o‘tkaziladi. Bundan tashqari, ba'zi malaka oshirish kurslari kontengent kamligi tufayli 2-3 yilda bir marta amalga oshiriladi. Ushbu holat esa komissiya tomonidan nazorat ishlarini o‘tkazish jarayonini cho‘zilib ketishiga olib keladi.
Attestatsiya jarayonini belgilangan muddatda o‘tkazilishini ta'minlash maqsadida kiritilgan ushbu o‘zgartirish natijasida tinglovchilarining fan dasturlarini o‘zlashtirish darajasi (bilimi)ni baholash uchun nazorat ishlari o‘tkazilmasdan, balki ta'lim muassasasi tomonidan o‘tkazilgan yakuniy nazoratlarni tahlil qilish amalga oshiriladi.
O‘ZBEKISTON RESPUBLIKASI VAZIRLAR MAHKAMASI HUZURIDAGI DAVLAT TEST MARKAZI
O‘ZBEKISTON RESPUBLIKASI OLIY VA O‘RTA MAXSUS TA'LIM VAZIRLIGI
O‘ZBEKISTON RESPUBLIKASI XALQ TA'LIMI VAZIRLIGINING
Qarori
O‘zbekiston Respublikasi ta'lim muassasalarini attestatsiyadan o‘tkazish mezonlari va texnologiyalari bo‘yicha yo‘riqnomaning 13-bandiga o‘zgartirish kiritish haqida
(O‘zbekiston Respublikasi qonun hujjatlari to‘plami, 2014 y., 52-son, 633-modda)
[O‘zbekiston Respublikasi Adliya vazirligi tomonidan 2014 yil 26 dekabrda ro‘yxatdan o‘tkazildi, ro‘yxat raqami 1836-1]
O‘zbekiston Respublikasi Vazirlar Mahkamasining 2004 yil 24 iyundagi 293-sonli «O‘zbekiston Respublikasi Vazirlar Mahkamasi huzuridagi Davlat test markazi faoliyatini takomillashtirish to‘g‘risida»gi va 2006 yil 10 fevraldagi 21-sonli «O‘zbekiston Respublikasi ta'lim muassasalarini davlat akkreditatsiyasidan o‘tkazish tartibi to‘g‘risidagi nizomni tasdiqlash haqida»gi qarorlariga muvofiq, O‘zbekiston Respublikasi Vazirlar Mahkamasi huzuridagi Davlat test markazi, Oliy va o‘rta maxsus ta'lim vazirligi hamda Xalq ta'limi vazirligi qaror qiladi:
1. O‘zbekiston Respublikasi Vazirlar Mahkamasi huzuridagi Davlat test markazi, O‘zbekiston Respublikasi Oliy va o‘rta maxsus ta'lim vazirligi va Xalq ta'limi vazirligining 2008 yil 12 iyundagi 01-193, 173 va 25-sonli qarori (ro‘yxat raqami 1836, 2008 yil 14 iyul) (O‘zbekiston Respublikasi qonun hujjatlari to‘plami, 2008 y., 29-30-son, 287-modda) bilan tasdiqlangan O‘zbekiston Respublikasi ta'lim muassasalarini attestatsiyadan o‘tkazish mezonlari va texnologiyalari bo‘yicha yo‘riqnomaning 13-bandi oltinchi xatboshisi quyidagi tahrirda bayon etilsin:
«Tinglovchilarning fan dasturlarini o‘zlashtirish darajasi (bilimi) Komissiya tomonidan ta'lim muassasasi o‘tkazgan yakuniy nazoratlarni tahlil qilish orqali baholanadi».
2. Mazkur qaror O‘zbekiston Respublikasi Sog‘liqni saqlash vazirligi, Qishloq va suv xo‘jaligi vazirligi, Tashqi ishlar vazirligi, Madaniyat va sport ishlari vazirligi, O‘rta maxsus kasb-hunar ta'limi markazi, «O‘zbekiston temir yo‘llari» davlat aksiyadorlik temir yo‘l kompaniyasi, Aloqa, axborotlashtirish va telekommunikatsiya texnologiyalari davlat qo‘mitasi, Davlat soliq qo‘mitasi, Navoiy kon-metallurgiya kombinati va O‘zbekiston Badiiy akademiyasi bilan kelishilgan.
3. Mazkur qaror rasmiy e'lon qilingan kundan e'tiboran kuchga kiradi.
Vazirlar Mahkamasi huzuridagi Davlat test markazi direktori J. ISMAILOV
Toshkent sh.,
2014 yil 19 dekabr,
27/qq-son
Oliy va o‘rta maxsus ta'lim vaziri A. VAXABOV
Toshkent sh.,
2014 yil 19 dekabr,
52/qq-son
Xalq ta'limi vaziri U. INOYATOV
Toshkent sh.,
2014 yil 19 dekabr,
61-son
Kelishilgan:
Sog‘liqni saqlash vaziri A. ALIMOV
2014 yil 19 dekabr
Qishloq va suv xo‘jaligi vaziri Sh. TESHAEV
2014 yil 19 dekabr
Tashqi ishlar vaziri A. KOMILOV
2014 yil 19 dekabr
Madaniyat va sport ishlari vaziri v.v.b. B. AXMEDOV
2014 yil 19 dekabr
O‘rta maxsus, kasb-hunar ta'limi markazi direktori U. SALIMOV
2014 yil 19 dekabr
«O‘zbekiston temir yo‘llari» davlat aksiyadorlik temir yo‘l kompaniyasi raisi A. RAMATOV
2014 yil 19 dekabr
Aloqa, axborotlashtirish va telekommunikatsiya texnologiyalari davlat qo‘mitasi raisi X. MIRZAXIDOV
2014 yil 19 dekabr
Davlat soliq qo‘mitasi raisi B. PARPIEV
2014 yil 19 dekabr
Navoiy kon-metallurgiya kombinati direktori Q. SANAQULOV
2014 yil 19 dekabr
O‘zbekiston Badiiy akademiyasi raisi A. NURITDINOV
2014 yil 19 dekabr